പട്ന: സര്ക്കാര് സ്കൂള് അധ്യാപകനെ തട്ടിക്കൊണ്ടുപോയി തോക്കുചൂണ്ടി ഭീഷണിപ്പെടുത്തി വിവാഹം കഴിപ്പിച്ചു. ബിഹാറിലെ വൈശാലി ജില്ലയിലാണ് സംഭവം. പെണ്കുട്ടിയുടെ പിതാവിനെതിരെ കേസ് രജിസ്റ്റര് ചെയ്തിട്ടുണ്ട്. അധ്യാപകന് ഗൗതം കുമാറിനെയാണ് ഒരു സംഘം തട്ടിക്കൊണ്ടുപോയി ബലമായി വിവാഹം കഴിപ്പിച്ചത്. തട്ടിക്കൊണ്ടുപോയ സംഘാംഗത്തിന്റെ മകളെത്തന്നെയാണ് അധ്യാപകന് വിവാഹം കഴിക്കേണ്ടിവന്നത്.
ക്ലാസെടുക്കുന്നതിനിടെയാണ് സ്കൂളിലെത്തിയ സംഘം ഗൗതമിനെ തട്ടിക്കൊണ്ടുപോയത്. മൂന്നുനാലു പേര് സ്കൂളിലെത്തി ബലമായി പിടിച്ചുകൊണ്ടുപോകുകയായിരുന്നു. പിന്നാലെ തോക്കുചൂണ്ടി വിവാഹം കഴിപ്പിച്ചു. ബിഹാറില് പുരുഷന്മാരെ തട്ടിക്കൊണ്ടുപോയി നിര്ബന്ധിച്ച് കല്യാണം കഴിപ്പിക്കുന്ന നിരവധി കേസുകള് ഇതിനോടകം റിപ്പോര്ട്ട് ചെയ്തിട്ടുണ്ട്. ‘ പകട്വ വിവാഹ്’ എന്നാണ് ഇത്തരത്തില് നടക്കുന്ന വിവാഹങ്ങളുടെ പേര്.
രാജേഷ് റായി എന്ന ആളാണ് ഗൗതമിനെ തട്ടിക്കൊണ്ടുപോയതിനു പിന്നിലെന്ന് ഗൗതമിന്റെ കുടുംബം ആരോപിച്ചു. രാജേഷിന്റെ മകള് ചാന്ദ്നിയെയാണ് ഗൗതം വിവാഹം കഴിച്ചത്. സംഭവവുമായി ബന്ധപ്പെട്ട് എഫ്ഐആര് റജിസ്റ്റര് ചെയ്തതായും തട്ടിക്കൊണ്ടുപോയവര്ക്കെതിരെ അന്വേഷണം ആരംഭിച്ചതായും പൊലീസ് അറിയിച്ചു.
