തെങ്ങ് മുറിക്കുന്നതിനിടെ ഉണ്ടായ അപകടത്തില് പരിക്കേറ്റ ഗൃഹനാഥന് മരിച്ചു.തെങ്ങ് മുറിക്കുന്നതിനിടെ ഉണ്ടായ അപകടത്തില് ഗുരുതര പരുക്കേറ്റ എരിയപ്പള്ളി നെല്ലിമണ്ണില് രാജനെ കല്പ്പറ്റയിലെ ആശുപത്രിയിലും തുടര്ന്ന് കോഴിക്കോട് മെഡിക്കല് കോളേജ് ആശുപത്രിയിലും എത്തിച്ചെങ്കിലും മരണപ്പെടുകയായിരുന്നു. ഞായറാഴ്ച രാവിലെ 11 മണിയോടെയാണ് അപകടമുണ്ടായത്. വീടിന് സമീപത്ത് ഉണങ്ങിനിന്നിരുന്ന തെങ്ങ് വെട്ടിമാറ്റുന്നതിനിടെ സമീപത്തുനിന്ന രാജന്റെ ദേഹത്തേക്ക് തെറിച്ചുവീഴുകയായിരുന്നു. നാട്ടുകാര് ഉടനെ കല്പറ്റ സ്വകാര്യ ആശുപത്രിയില് എത്തിച്ചു.
പരിക്ക് ഗുരുതരമായതിനാല് കോഴിക്കോട് മെഡിക്കല്കോളേജ് ആശുപത്രിയിലേക്ക് വിദഗ്ധചികിത്സയ്ക്ക് കൊണ്ടുപോകാന് ഡോക്ടര്മാര് നിര്ദേശിച്ചു. തുടര്ന്ന് മൊബൈല് ഐ.സി.യു.വില് രാജനുമായി കോഴിക്കോട്ടേക്ക് ആംബുലന്സ് പുറപ്പെട്ടു. എന്നാല്, ആംബുലന്സ് താമരശ്ശേരി ചുരത്തിലെ ഗതാഗത കുരുക്കില് പെടുകയായിരുന്നു.ഏറെനേരം ശ്രമിച്ചെങ്കിലും ഗതാഗതക്കുരുക്ക് മറികടന്ന് ആംബുലന്സിന് പോകാനായില്ലെന്നും ഗതാഗതനിയന്ത്രണത്തിനായി പോലീസ് സ്ഥലത്തുണ്ടായിരുന്നില്ലെന്നും രാജന്റെ ബന്ധുക്കള് പറഞ്ഞു.എന്നാല് താമരശ്ശേരി ചുരം എത്തുന്നതിന് മുമ്പ് വൈത്തിരിയില് വെച്ച് രാജന് ബി.പി കുറഞ്ഞപ്പോള് വൈത്തിരി താലൂക്ക് ആശുപത്രിയിലേക്ക് കൊണ്ടുപോയെന്നും ഇവിടെ വെച്ചാണ് മരണം സ്ഥീരികരിച്ചത് എന്നുമുള്ള വിവരങ്ങളും പുറത്തുവരുന്നുണ്ട്.
തെങ്ങുവീണ് ഗുരുതരമായി പരിക്കേറ്റു,ആംബുലന്സ് ചുരത്തിലെ ഗതാഗതക്കുരുക്കില്പ്പെട്ടു,ഗൃഹനാഥന് മരിച്ചു
