കുടുംബശ്രീയുടെ 26-ാം വാര്‍ഷികത്തോടനുബന്ധിച്ച് സംഘടിപ്പിക്കുന്ന ‘അരങ്ങ് 2024’ കലോത്സവത്തിന്റെ ജില്ലാ മത്സരത്തില്‍ കോഴിക്കോട് ക്ലസ്റ്റര്‍ മുന്നേറുന്നു. കലോത്സവം പുരോഗമിക്കുമ്പോള്‍ 85 പോയിന്റുമായി കോഴിക്കോട് ക്ലസ്റ്റര്‍ മുന്നിലാണ്. 75 പോയിന്റുമായി ബാലുശ്ശേരി ക്ലസ്റ്ററാണ് രണ്ടാം സ്ഥാനത്ത്. എട്ട് ദിവസങ്ങളായി നടത്തിയ വടകര, കൊയിലാണ്ടി, കോഴിക്കോട്, ബാലുശ്ശേരി ക്ലസ്റ്റര്‍തല മത്സരത്തില്‍ വിജയികളായ കുടുംബശ്രീ അംഗങ്ങളും ഓക്‌സിലറി അംഗങ്ങളുമാണ് ജില്ലാതലത്തില്‍ മാറ്റുരക്കുന്നത്.
നടക്കാവ് ഗേള്‍സ് ഹയര്‍സെക്കണ്ടറി സ്‌കൂളില്‍ മൂന്ന് വേദികളിലായി 33 ഇനങ്ങളിലാണ് മത്സരങ്ങള്‍ നടക്കുന്നത്. കലോത്സവം അസിസ്റ്റന്റ് കലക്ടര്‍ ആയുഷ് ഗോയല്‍ ഉദ്ഘാടനം ചെയ്തു. നടന്‍ വിനോദ് കോവൂര്‍ മുഖ്യാതിഥിയായി. കുടുംബശ്രീ ജില്ലാമിഷന്‍ കോ-ഓര്‍ഡിനേറ്റര്‍ ആര്‍ സിന്ധു അദ്ധ്യക്ഷത വഹിച്ചു. കലോത്സവം ശനിയാഴ്ച സമാപിക്കും.
ജൂണ്‍ 7, 8 ,9 തീയതികളില്‍ കാസര്‍ഗോഡ് പീലിക്കോട് വച്ചു നടക്കുന്ന സംസ്ഥാന അരങ്ങ് കലോത്സവത്തില്‍ ജില്ലാതല വിജയികള്‍ പങ്കെടുക്കും.
