പഴക്കം ചെന്ന വൈനുകൾ വൈൻപ്രേമികൾക്ക് ഏറെ പ്രിയപ്പെട്ടതാണ്. തികച്ചും യാദൃച്ഛികമായി 5000 വർഷം പഴക്കമുള്ള വൈൻ കണ്ടെത്തിയിരിക്കുകയാണ് പുരാവസ്തു ഗവേഷകർ. ഒരു ഈജിപ്ഷ്യൻ രാജ്ഞിയുടെ ശവകുടീരത്തെക്കുറിച്ചുള്ള അന്വേഷണത്തിനിടെയാണ് ഗവേഷകർ ഈ വൈൻ കണ്ടെത്തുന്നത്. മരണാനന്തര യാത്രയിൽ രാജ്ഞിക്ക് കുടിക്കാൻ എന്ന ഉദ്ദേശത്തോടെയാവണം വൈൻ ശവകുടീരത്തിൽ വച്ചിരിക്കുന്നത് എന്നാണ് കരുതുന്നത്.ഏകദേശം ബിസി 3,000 -മുതലാണ്, മെറേറ്റ്-നീത്ത് രാജ്ഞി അബിഡോസിൽ അന്ത്യവിശ്രമം കൊള്ളുന്നത്. അവിടെ ഈജിപ്തിലെ ഈ ശ്മശാനസ്ഥലത്ത് സ്വന്തമായി ശവകുടീരമുള്ള ഏക സ്ത്രീ എന്ന ബഹുമതിയും ഈ രാജ്ഞിക്ക് മാത്രമുള്ളതാണ്. ആ കാലഘട്ടത്തിലെ ഏറ്റവും ശക്തയായ സ്ത്രീയായിരുന്നു അവർ എന്നും ഈജിപ്തിലെ ആദ്യത്തെ വനിതാ ഫറവോൻ പോലും ആയിരിക്കാമെന്നുമാണ് ഗവേഷകർ പറയുന്നത്.അവരുടെ ശവകുടീരം പരിശോധിക്കെ നിരവധി കരകൗശല വസ്തുക്കൾ ഇവിടെ നിന്നും കണ്ടെത്തി. അതിൽ പെടുന്നതാണ് ഈ വൈൻ ജാറുകളും. ഏതാണ്ട് 5000 വർഷങ്ങൾക്ക് മുമ്പാണ് ഇത് ശവകുടീരത്തിൽ വച്ചത് എന്നാണ് ഗവേഷകരുടെ അനുമാനം. ഈ വൈൻ ജാറുകളടക്കം ഇവിടെ നിന്നും കണ്ടെത്തിയ വസ്തുക്കളെല്ലാം അവയുടെ ചരിത്രപ്രാധാന്യം മനസിലാക്കുന്നതിന് വേണ്ടി പഠിച്ചു കൊണ്ടിരിക്കുകയാണ് എന്ന് ആർക്കിയോളജിസ്റ്റായ പ്രൊഫസ്സർ ക്രിസ്റ്റീന കോലർ പറഞ്ഞു.ഏതായാലും ഗവേഷണത്തിലൂടെ അന്നത്തെ കാലത്തെ കുറിച്ചും രാജ്ഞിയെ കുറിച്ചും കൂടുതൽ അറിവുകൾ ലഭിക്കുമെന്നും ഗവേഷകർ പ്രതീക്ഷിക്കുന്നു.