നാളെ മുതൽ പെട്രോളിനും ഡീസലിനും സംസ്ഥാനത്ത് വില കൂടും. പെട്രോൾ, ഡീസൽ വിലയിൽ രണ്ടു രൂപയുടെ വർധനയാണുണ്ടാകുക. ഇത് കൂടാതെ രാജ്യത്ത് പുതിയ മലിനീകരണ നിയന്ത്രണ മാനദണ്ഡങ്ങൾ കർശനമാകുന്നതിൽ വാഹന നിർമാതാക്കൾ എല്ലാ മോഡലിലെ വാഹനങ്ങൾക്കും വില ഉയർത്തും.
ഇരു ചക്രവാഹനങ്ങളും കാറുകളും ഉൾപ്പെടെയുള്ള എല്ലാ വാണിജ്യ വാഹനങ്ങൾക്കും നിരക്ക് വർധന ബാധകമാകും. പ്രാധാന ഓട്ടോമൊബൈൽ കമ്പനികൾ വാഹനങ്ങൾക്ക് 50,000 രൂപ വരെ നിരക്ക് വർധന പ്രഖ്യാപിച്ചിട്ടുണ്ട്. അതുപോലെ സംസ്ഥാനത്ത് മദ്യത്തിന് വില കൂടും.
999 വരെയുള്ള മദ്യത്തിന് 20 രൂപയും 1000 രൂപയ്ക്ക് മുകളിലുള്ള മദ്യത്തിന് 40 രൂപയുമാണ് വർധിക്കുന്നത്. പുതിയ നികുതി നിർദേശങ്ങൾ പ്രാബല്യത്തിൽ വരുന്നതിനാൽ ഫ്ളാറ്റുകൾക്കും അപ്പാർട്ട്മെന്റുകൾക്കുമുള്ള സ്റ്റാംപ് ഡ്യൂട്ടി രണ്ട് ശതമാനം വർധിക്കും.
ഭൂമിയുടെ ന്യായവിലയിൽ 20 ശതമാനമാണ് വർധന. ഇത് സ്റ്റാമ്പ് ഡ്യൂട്ടിയും രജിസ്ട്രേഷൻ ഫീസും വ‍ർധിപ്പിക്കും. നികുതിവർധനവ് വഴി പരമാവധി വരുമാനം ഉറപ്പാക്കാകുയാണ് സർക്കാർ ലക്ഷ്യമിടുന്നത്. വിപണിവിലയും ഭൂമിയുടെ ന്യായവിലയും തമ്മിലുള്ള അന്തരം കുറയ്ക്കാനാണ് ഭൂമിയുടെ ന്യായ വില ഉയർത്തുന്നതെന്ന് ധനമന്ത്രി വ്യക്തമാക്കിയിരുന്നു.
