കൊവിഡ് വ്യാപിക്കുന്ന പശ്ചാത്തലത്തില് സൗജന്യ ഭക്ഷ്യകിറ്റ് വിതരണം അടുത്ത നാലുമാസം കൂടി തുടരുമെന്ന് മുഖ്യമന്ത്രി പിണറായി വിജയന്. ഇനിയുള്ള ദിവസങ്ങളിലും കൊവിഡ് 19 ശക്തമായി തുടരുമെന്നതിനാല് സാധാരണക്കാരായ മനുഷ്യര്ക്ക് നേരിട്ട് തന്നെ പരമാവധി സമാശ്വാസ സഹായങ്ങള് എത്തിക്കാനാണ് ഉദ്ദേശിക്കുന്നത്. നമ്മുടെ നാട്ടില് ഒരാളും പട്ടിണി കിടക്കാന് പാടില്ല. പ്രതിസന്ധി ഘട്ടത്തില് സര്ക്കാര് ആവിഷ്കരിച്ച് വളരെയേറെ പ്രശംസ പിടിച്ചുപറ്റിയതാണ് ഭക്ഷ്യകിറ്റ് വിതരണം. ലോക്ക്ഡൗണ് പ്രഖ്യാപിച്ച ഘട്ടത്തില് 86 ലക്ഷം കുടുംബങ്ങള്ക്കാണ് ഭക്ഷ്യകിറ്റ് വിതരണം ചെയ്തത്. ഈ ഓണക്കാലത്ത് 88 ലക്ഷം കുടുംബങ്ങള്ക്ക് വിതരണം ചെയ്യുകയാണ്. ഇത് ഇവിടെ അവസാനിക്കുകയല്ല. ഈ ഭക്ഷ്യകിറ്റ് വിതരണം അടുത്ത നാല് മാസം തുടരും. റേഷന് കടകള് വഴി ഇപ്പോള് ചെയ്യുന്നതുപോലെ തന്നെയാകും വിതരണം ചെയ്യുകയെന്നും മുഖ്യമന്ത്രി പറഞ്ഞു.
സാമൂഹ്യക്ഷേമ പെന്ഷനുകള് 100 രൂപകൂടി വര്ധിപ്പിക്കുമെന്നും മുഖ്യമന്ത്രി പറഞ്ഞു. ഇനി പെന്ഷന് മാസംതോറും വിതരണം ചെയ്യുമെന്നും മുഖ്യമന്ത്രി പറഞ്ഞു. യുഡിഎഫ് ഭരണം ഒഴിയുമ്പോള് 35 ലക്ഷം പേര്ക്ക് 600 രൂപ നിരക്കിലായിരുന്നു പെന്ഷന്. അതുപോലും കൃത്യമായി വിതരണം ചെയ്യാന് സാധിച്ചിരുന്നില്ല. കഴിഞ്ഞ നിയമസഭാ തെരഞ്ഞെടുപ്പില് എല്ഡിഎഫ് പ്രകടന പത്രികയില് ജനങ്ങള്ക്ക് മുന്നില് വച്ച പ്രധാന വാഗ്ദാനമായിരുന്നു സാമൂഹ്യ ക്ഷേമ പെന്ഷനുകളിലെ വര്ധന. അത് അക്ഷരംപ്രതി പാലിക്കാന് കഴിഞ്ഞു.
പെന്ഷന് തുക 600 രൂപയില് നിന്ന് 1000 രൂപയായും പിന്നീട് 1200 രൂപയായും 1300 രൂപയായും വര്ധിപ്പിച്ചു. 35 ലക്ഷം ഗുണഭോക്താക്കള് എന്നത് 58 ലക്ഷമാക്കി ഈ സര്ക്കാരിന്റെ കാലത്ത് വര്ധിപ്പിച്ചു. എന്നുപറഞ്ഞാല് അര്ഹരായ 23 ലക്ഷം പേരെ പുതിയതായി പദ്ധതിയില് ഉള്പ്പെടുത്താന് സാധിച്ചു എന്നും മുഖ്യമന്ത്രി പറഞ്ഞു.
