അൺലോക്ക് നാലാംഘട്ട മാർഗനിർദേശങ്ങൾ കേന്ദ്ര ആഭ്യന്തര മന്ത്രാലയം പ്രഖ്യാപിച്ചു. സെപ്റ്റംബർ 1 മുതൽ 30 വരെയാണ് അൺലോക്ക് നാലാംഘട്ടം. വിദ്യാഭ്യാസസ്ഥാപനങ്ങൾ, ഇൻഡോർ തിയറ്ററുകൾ, സ്വിമ്മിങ് പൂളുകൾ എന്നിവ ഈ ഘട്ടത്തിലും തുറക്കില്ല. ഒമ്പതു മുതൽ പന്ത്രണ്ടു വരെ ക്ലാസുകളിലെ വിദ്യാർഥികൾക്ക് സ്കൂളിലെത്തി അധ്യാപകരോട് ഉപദേശം തേടാം. ഇതിന് രക്ഷിതാക്കൾ സമ്മതം എഴുതി നൽകണം. അതേസമയം, കണ്ടെയ്‌ൻമെന്റ് സോണുകളിൽ ഇതിന് അനുമതിയില്ല.
സെപ്റ്റംബർ ഏഴു മുതൽ മെട്രോ ട്രെയിൻ സർവീസുകൾ ആരംഭിക്കും. സെപ്റ്റംബർ 21 മുതൽ പൊതുപരിപാടികൾക്ക് ഉപാധികളോടെ അനുമതി നൽകി. രാഷ്ട്രീയ, വിനോദ, കായിക, മത, സാമൂഹിക, സാംസ്കാരിക പരിപാടികൾ നടത്താം. നൂറിൽ കൂടുതൽ ആളുകൾ പാടില്ല. കോവിഡ് മാനദണ്ഡങ്ങൾ പാലിക്കണം. സെപ്റ്റംബർ 21 മുതൽ ഓപ്പൺ എയർ തിയറ്ററുകളിൽ പരിപാടികൾ നടത്താം.
