അടുത്ത മാസം റിലീസിന് കാത്തിരിക്കുന്ന അക്ഷയ് കുമാറിന്റെ ചിത്രമായ ലക്ഷ്മി ബോംബിനെതിരെ വക്കീൽ നോട്ടീസുമായി കര്ണിസേന. ചിത്രത്തിന്റെ പേര് മാറ്റണമെന്ന് ആവശ്യപ്പെട്ടാണ് അണിയറ പ്രവര്ത്തകര്ക്ക് വക്കീൽ നോട്ടീസ് അയച്ചിരിക്കുന്നത്. ലക്ഷ്മീദേവിയെ അവഹേളിക്കുന്നതും അപകീർത്തിപ്പെടുത്തുന്നതുമാണ് ഈ തലക്കെട്ടെന്ന് ആരോപിച്ചാണ് നോട്ടീസ്.
അഭിഭാഷകനായ രാഘവേന്ദ്ര മെഹ്റോത്ര മുഖേനയാണ് കര്ണിസേന നോട്ടീസ് അയച്ചിരിക്കുന്നതെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്യുന്നു. ഹിന്ദു സംസ്കാരത്തിന്റെ പ്രത്യയശാസ്ത്രം, ആചാരങ്ങൾ, ദേവന്മാർ, ദേവതകൾ എന്നിവരെ കുറിച്ച് സമൂഹത്തിന് തെറ്റായ സന്ദേശമാണ് തലക്കെട്ട് നൽകുന്നതെന്ന് സംഘടന ആരോപിക്കുന്നു. നവംബര് 9ന് ദീപാവലി റിലീസ് ആയി ചിത്രം പ്രേക്ഷകരുടെ മുന്നിൽ എത്താനിരിക്കെയാണ് പേര് മാറ്റണമെന്ന ആവശ്യവുമായി കര്ണിസേന രംഗത്തെത്തിയിരിക്കുന്നത്. നേരത്തെ ചിത്രത്തിനെതിരെ ബഹിഷ്കരണാഹ്വാനവുമായി ട്വിറ്ററില് ചിലര് എത്തിയിരുന്നു. കിയാര അദ്വാനി നായികയാവുന്ന ചിത്രത്തില് തുഷാര് കപൂര്, ഷരദ് കേല്ക്കര്, തരുണ് അറോറ, അശ്വിനി കല്സേക്കര് തുടങ്ങിയവരും അഭിനയിക്കുന്നു.
