ഓരോ ഇന്ത്യക്കാരന്റേയും ആത്മാവ് വേദനിച്ച ദിനമാണ് ഇന്നെന്ന് കെ. സി വേണുഗോപാൽ. .കർഷക റാലിയിൽ ഡൽഹി പൊലീസ് നടപടിയെ വിമർശിച്ചാണ് അദ്ദേഹം രംഗത്തെത്തിയത്. ജയ് ജവാൻ, ജയ് കിസാൻ എന്ന് വിളിക്കുന്ന നാട്ടിൽ റിപ്പബ്ലിക് ദിനത്തിൽ കർഷകർക്ക് കൊടുക്കേണ്ട സമ്മാനമാണോ ഇതെന്ന് വേണുഗോപാൽ ചോദിച്ചു.കർഷകർക്കെതിരെ നടന്ന ആക്രമണങ്ങൾക്ക് കേന്ദ്രസർക്കാർ മാത്രമാണ് ഉത്തരവാദി. പാർലമെന്റിൽ വിഷയം ഉന്നയിക്കുമെന്നും കെ. സി വേണുഗോപാൽ പറഞ്ഞു. ലോകത്തിന്റെ മുന്നിൽ രാജ്യം നാണംകെട്ടു. ഇനിയെങ്കിലും വിവാദ നിയമങ്ങൾ കേന്ദ്രസർക്കാർ പിൻവലിക്കണമെന്നും കെ. സി വേണുഗോപാൽ കൂട്ടിച്ചേർത്തു.
കർഷകർ ജീവിക്കാൻ വേണ്ടിയുള്ള സമരത്തിലാണ്. അവർക്ക് ആരെയും അട്ടിമറിക്കാൻ ഉദ്ദേശ്യമില്ല. അതുകൊണ്ടുതന്നെ അത് വിജയം കാണും. കർഷക സമരത്തെ രാഷ്ട്രീയവസൽക്കരിക്കേണ്ടെന്നും എന്നാൽ കർഷകർക്ക് രാഷ്ട്രീയത്തിന് അതീതമായി എല്ലാ പിന്തുണയും നൽകുന്നുണ്ടെന്നും കെ.സി. വേണുഗോപാൽ പറഞ്ഞു.
