പാലക്കാട്: കീം ഡ്യൂട്ടി ചെയ്ത അധ്യാപികയ്ക്കും മകള്ക്കും കോവിഡ് സ്ഥിരീകരിച്ചു. കഞ്ചിക്കോട് ഗവ. വൊക്കേഷനല് ഹയര് സെക്കന്ഡറി സ്കൂളില് കേരള എന്ട്രന്സ് (കീം) പരീക്ഷയുടെ ഡ്യൂട്ടിയിലുണ്ടായിരുന്ന അധ്യാപികക്കാണ് കോവിഡ് പോസിറ്റീവായത്. ഇവിടെ ഡ്യൂട്ടിയിലുണ്ടായിരുന്ന മറ്റ് അധ്യാപകരെയും 40 വിദ്യാര്ഥികളെയും നിരീക്ഷണത്തിലാക്കി.
കഞ്ചിക്കോട് സ്വദേശിയായ അധ്യാപികയുടെ മകളും കോവിഡ് പോസിറ്റീവാണ്. മകള് ചെന്നൈയില് നിന്ന് വന്നതാണ്. തമിഴ്നാട്ടില് നിന്ന് മകളെ നാട്ടിലേക്ക് കൊണ്ടുവരാന് നേരത്തെ അദ്ധ്യാപിക പോയിരുന്നതായി റിപ്പോര്ട്ടുണ്ട്. ഇവരുടെ അടുത്ത ബന്ധുവിനു തമിഴ്നാട്ടില് കോവിഡ് സ്ഥിരീകരിച്ചിരുന്നു. ഇവിടെ നിന്നാകാം രോഗം ബാധയെന്നാണു പ്രാഥമിക നിഗമനം.
16നായിരുന്നു കേരള എന്ജിനീയറിങ്, ഫാര്മസി പ്രവേശനപ്പരീക്ഷ. കഞ്ചിക്കോട് സ്കൂളില് 2 ക്ലാസ് മുറികളുടെ ചുമതലയാണ് ഇവര്ക്കുണ്ടായിരുന്നത്. നിരീക്ഷണത്തിലിരിക്കുന്ന വിദ്യാര്ഥികളടക്കമുള്ളവര്ക്ക് ആവശ്യമെങ്കില് സാംപിള് പരിശോധന നടത്തുമെന്ന് ആരോഗ്യവകുപ്പ് അറിയിച്ചു. തിരുവനന്തപുരത്തും കോഴിക്കോടുമായി കീം പരീക്ഷയെഴുതിയ വിദ്യാര്ത്ഥികള്ക്ക് നേരത്തെ രോഗബാധ സ്ഥിരീകരിച്ചിരുന്നു.
