കുന്ദമംഗലം –പെരിങ്ങുളം എംഎൽഎ റോഡിൽ വിവിധ സ്ഥാപനങ്ങളുടെ കേബിളുകൾ അശ്രദ്ധമായ രീതിയിൽ തൂങ്ങി കിടക്കുന്നത് വഴിയാത്രക്കാരുടെയും വാഹനയാത്രക്കാരുടെയും ജീവൻ അപകടത്തിലാക്കും സ്കൂട്ടറുകളിലും ഇരുചക്ര വാഹനങ്ങളിലും സഞ്ചരിക്കുന്നവർക്കും കാൽനടയാത്രക്കാർക്കും ഇത് വലിയ ഭീഷണിയായി മാറിയിരിക്കുകയാണ്.
ഇത്തരത്തിൽ റോഡിന് മുകളിൽ അലക്ഷ്യമായി കിടക്കുന്ന കേബിളുകൾ മുൻകാലങ്ങളിൽ നിരവധി അപകടങ്ങൾക്കും, ചില ഇടങ്ങളിൽ മരണങ്ങൾക്കുമെല്ലാം കാരണമായിട്ടുണ്ടെന്നത് ആശങ്ക വർധിപ്പിക്കുന്നു. കുന്ദമംഗലത്തെ പെരിങ്ങുളം ഭാഗത്തെ എംഎൽഎ റോഡിലാണ് നിലവിൽ കേബിളുകൾ അപകടകരമായി തൂങ്ങി കിടക്കുന്നത്. ഇതുവഴി യാത്ര ചെയ്യുന്നവർക്ക് വലിയ ബുദ്ധിമുട്ടാണ് നേരിടേണ്ടി വരുന്നത്.
ഏത് സ്ഥാപനങ്ങളുടെ കേബിളുകളാണ് ഇത്തരത്തിൽ അപകടാവസ്ഥ സൃഷ്ടിക്കുന്നതെന്ന് വ്യക്തമായിട്ടില്ല. എങ്കിലും ഇവിടെ അപകടം പതിയിരിക്കുന്നുവെന്നത് യാഥാർഥ്യമാണെന്ന് നാട്ടുകാർ ചൂണ്ടിക്കാട്ടുന്നു. പ്രത്യേകിച്ച് രാത്രികാലങ്ങളിൽ ആവശ്യമായ വെളിച്ചം ലഭ്യമല്ലാത്തതിനാൽ, സ്കൂട്ടർ യാത്രക്കാർക്ക് ഈ കേബിളുകൾ കാണാതെ കുടുങ്ങി അപകടത്തിൽപ്പെടാനുള്ള സാധ്യത ഏറെ കൂടുതലാണ്.
ബന്ധപ്പെട്ട വകുപ്പുകളും സ്ഥാപനങ്ങളും അടിയന്തിരമായി ഇടപെട്ട് പ്രശ്നത്തിന് ശാശ്വത പരിഹാരം കണ്ടെത്തിയില്ലെങ്കിൽ വലിയ ദുരന്തങ്ങൾക്ക് ഇത് കാരണമാകുമെന്ന് പ്രദേശവാസികൾ മുന്നറിയിപ്പ് നൽകുന്നു.
കുന്ദമംഗലം എംഎൽഎ റോഡിൽ അപകടഭീഷണി: കേബിളുകൾ തൂങ്ങി കിടക്കുന്നു
