മുംബൈ; ഐഫോൺ 15 സീരീസ് ഫോണുകൾക്ക് ആദ്യ ദിനത്തിൽ ഇന്ത്യയിൽ ഇരട്ടി വിൽപന. കഴിഞ്ഞ വർഷം ഓൺലൈൻ ഓഫ്‌ലൈൻ സ്റ്റോറുകൾ വഴി ആദ്യ ദിനത്തിൽ വിറ്റഴിച്ചതിനേക്കാൾ രണ്ടിരട്ടിയിലേറെ ഫോണുകളാണ് കഴിഞ്ഞ ദിവസം വിറ്റത്. വിൽപ്പനയുടെ ആദ്യ ദിനം ആപ്പിളിന്റെ മുംബൈയിലും, ഡൽഹിയിലുമുള്ള ഔദ്യോഗിക സ്‌റ്റോറുകളിൽ വൻ ജനത്തിരക്കായിരുന്നു. മുൻകൂട്ടി ഓർഡർ ചെയ്ത ഉപഭോക്താക്കൾ മണിക്കൂറുകളോളം വരി നിന്നാണ് ഫോണുകൾ വാങ്ങിയത്.
ഇത്തവണ ഐഫോൺ 15 പ്രോമാക്‌സിന് വലിയ ആരാധകരുണ്ടെന്നാണ് വിവരം. രാജ്യത്ത് പ്രീമിയം ഫോണുകളോടുള്ള താൽപര്യം വർധിച്ചുവരുന്നുണ്ടെന്ന സൂചനയായാണ് ആപ്പിളിന്റെ റെക്കോർഡ് വിൽപന വിലയിരുത്തുപ്പെടുന്നത്. ഇന്ത്യൻ നിർമിതമായ ഐഫോണുകൾ ആദ്യ ദിവസം തന്നെ വിൽപനയ്‌ക്കെത്തിയിട്ടുണ്ട്. ആദ്യ ദിനത്തിലെ വിൽപനയിൽ വലിയ ആവേശത്തിലാണ് ആപ്പിൾ.
ഐഫോൺ 15 സീരീസിന് വേണ്ടിയുള്ള പ്രീ-ഓർഡറുകളിൽ മുൻവർഷത്തേക്കാൾ 50 ശതമാനം വർധനവുണ്ടായിട്ടുണ്ടെന്ന് ഐഎഎൻഎസ് റിപ്പോർട്ടിൽ പറയുന്നു. കഴിഞ്ഞ വർഷം വിറ്റഴിച്ച ഐഫോൺ 14 സീരീസിൽ 85 ശതമാനവും 14 പ്ലസ് മോഡലുകളായിരുന്നുവെന്നാണ് സൈബർ മീഡിയ റിസർച്ച് നൽകുന്ന വിവരം.
ഇത്തവണ 48 എംപി ക്യാമറ, ഡൈനാമിക് ഐലന്റ് ഉള്ള സ്‌ക്രീൻ എല്ലാം പുതിയ ഫോണുകളിലേക്ക് ഉപഭോക്താക്കളെ ആകർഷിക്കുന്ന ഘടകങ്ങളാണ്.
