തമിഴ്നാട്ടിലെ സുവിശേഷ പ്രഭാഷകന്‍ പോള്‍ ദിനകരന്റെ വീടുകളിലും ഓഫീസുകളിലും ആദായ നികുതി വകുപ്പിന്റെ റെയ്ഡ് തുടരുന്നു. നിരവധി രേഖകള്‍ പിടിച്ചെടുത്തുവെന്നാണ് റിപ്പോര്‍ട്ട് ദിനകരനെതിരെ കള്ളപ്പണം വെളുപ്പിക്കലിന് കേസെടുത്തേക്കുമെന്നും സൂചനയുണ്ട്.
ജീസസ് കാളിങ് എന്ന സുവിശേഷ സംഘത്തിന്റെ ഓഫീസുകളിലും വീടുകളിലും സ്ഥാപനങ്ങളിലുമാണ് കഴിഞ്ഞ രണ്ട് ദിവസമായി റെയ്ഡ് തുടരുന്നത്. ജീസസ് കാളിങ്ങിന്റെ ഉടമയും പ്രമുഖ പ്രഭാഷകനുമാണ് പോള്‍ ദിനകരന്‍. ദിനകരന്റെ അഡയാറിലെ വീട്ടിലും ഓഫീസിലും വ്യാഴാഴ്ച രാവിലെയാണ് റെയ്ഡ് ആരംഭിച്ചത്. തുടര്‍ന്ന് ചെന്നൈ, കോയമ്പത്തൂര്‍ എന്നിവിടങ്ങളിലെ 28 കേന്ദ്രങ്ങളിലായാണ് ഒരേ സമയം റെയ്ഡ് നടന്നത്.
പോള്‍ ദിനകരന്‍ ചാന്‍സലറായിട്ടുള്ള കോയമ്പത്തൂരിലെ കാരുണ്യ സര്‍വകലാശാലയുടെ നിയന്ത്രണം ഐ.ടി വകുപ്പ് ഏറ്റെടുത്തു. ജീസസ് കാളിങ്ങിന്റെ മറവില്‍ വന്‍തോതില്‍ നികുതി വെട്ടിപ്പ് നടക്കുന്നതായി കേന്ദ്രസര്‍ക്കാരിന് പരാതി ലഭിച്ചിരുന്നു. വിദേശ സംഭാവനകള്‍ വഴിമാറ്റി രാജ്യത്തിനകത്തും പുറത്തും നിക്ഷേപങ്ങള്‍ നടത്തിയെന്നാണ് ആദായനികുതി വകുപ്പിന് ലഭിച്ചിരിക്കുന്ന വിവരം. സമാനമായി ബിലീവേഴ്സ് ചര്‍ച്ചിന്റെ സ്ഥാപനങ്ങളിലും ഓഫീസുകളിലും നേരത്തെ ആദായ നികുതി വകുപ്പ് റെയ്ഡ് നടത്തിയിരുന്നു, കണക്കില്‍ പെടാത്ത പണം അടക്കം റെയ്ഡില്‍ പിടിച്ചെടുത്തിരുന്നു.
