ഇസ്രയേലുമായുള്ള വെടിനിർത്തൽ കരാർ പാലിക്കുന്നതിൽ പരാജയപ്പെട്ടാൽ ഹമാസിനെ ഉന്മൂലനം ചെയ്യുമെന്ന് ആവർത്തിച്ച് അമേരിക്കൻ പ്രസിഡന്റ് ഡോണൾഡ് ട്രംപ്. ഹമാസിനെതിരെ അമേരിക്കൻ സൈന്യം ഇടപെടില്ല. എന്നാൽ, ഇസ്രയേൽ സൈന്യത്തോട് ഗസ്സയിലേക്ക് പോകാൻ താൻ ആവശ്യപ്പെട്ടാൽ രണ്ട് മിനിറ്റിനുള്ളിൽ അവർ അങ്ങോട്ട് പോകുമെന്നും ട്രംപ് പറഞ്ഞു.
വെടിനിർത്തൽ ഇപ്പോഴും നിലനിൽക്കുന്നുവെന്ന കാര്യം ആരും മറക്കരുതെന്ന് ഡോണൾഡ് ട്രംപ് പരസ്യമായി താക്കീത് നൽകിയിരുന്നു. ഇതിന് പിന്നാലെ അമേരിക്ക സമ്മർദ്ദം ശക്തമാക്കിയതിനെ തുടർന്നാണ് ഇസ്രയേൽ സേന പിൻവാങ്ങിയതെന്നാണ് സൂചനകൾ. ഗസ്സയിലേക്കുള്ള മാനുഷിക സഹായം തടഞ്ഞതടക്കമുള്ള നടപടികൾ ഇസ്രയേൽ സൈന്യം അവസാനിപ്പിക്കുമെന്നാണ് വ്യക്തമാകുന്നത്. അങ്ങനെയെങ്കിൽ വൈകാതെ തന്നെ ഗസ്സയിലേക്കുള്ള മാനുഷിക സഹായം പുനഃരാരംഭിക്കാനാകും.
ഇരുപതിന സമാധാനപദ്ധതിയുടെ അടുത്ത ഘട്ടത്തെപ്പറ്റി ചർച്ച ചെയ്യാൻ അമേരിക്കയുടെ പശ്ചിമേഷ്യൻ പ്രതിനിധി സ്റ്റീവ് വിറ്റ്കോഫും ട്രംപിന്റെ മരുമകൻ ജറേഡ് കുഷ്നറും ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവുമായി കൂടിക്കാഴ്ച നടത്തി. അമേരിക്കൻ വൈസ് പ്രസിഡന്റ് ജെ ഡി വാൻസ് ഇന്ന് നെതന്യാഹുവുമായി കൂടിക്കാഴ്ച നടത്തും.
അതേസമയം, യെമനിലെ സനയിൽ ഹൂതികൾ തടഞ്ഞുവച്ച അഞ്ച് യെമനി ഐക്യരാഷ്ട്ര സഭാ ജീവനക്കാരെ വിട്ടയച്ചു.15 അന്താരാഷ്ട്ര ജീവനക്കാരെ ഐക്യരാഷ്ട്രസഭാ ഓഫീസിന്റെ പരിസരത്ത് മാത്രം സ്വതന്ത്രമായി സഞ്ചരിക്കാനും അനുവദിച്ചു. കഴിഞ്ഞ ശനിയാഴ്ചയാണ് ഹൂതികൾ സനയിലെ ഹാദയിലെ ഐക്യരാഷ്ട്രസഭാ ഓഫീസിലെത്തി ജീവനക്കാരെ കസ്റ്റഡിയിലെടുത്തത്. യു എൻ ജീവനക്കാരും മറ്റ് സംഘടനകളിലെയും ജീവനക്കാർ ചാരന്മാരാണെന്ന് ആരോപിച്ചാണ് ഹൂതികൾ തടഞ്ഞുവെച്ചത്. രണ്ടു മാസം മുമ്പ് ഇസ്രയേൽ ആക്രമണത്തിൽ ഹൂതി പ്രധാനമന്ത്രി അഹമ്മദ് അൽ റഹാവി ഉൾപ്പെടെ ഉന്നത സർക്കാർ ഉദ്യോഗസ്ഥർ കൊല്ലപ്പെട്ടിരുന്നു.
