തന്റെ പേരില് വ്യാജ ഫേസ്ബുക്ക് അക്കൗണ്ട് നിര്മിച്ച് കമന്റ് ഇടുന്നയാളെ കണ്ടെത്താന് സൈബര് സെല്ലില് പരാതി നല്കി നടൻ നസ്ലിൻ.കുറച്ച് സുഹൃത്തുക്കൾ സ്ക്രീൻ ഷോട്ട് എടുത്ത് അയച്ചുതന്നപ്പോഴാണ് ഇങ്ങനെയൊരു പ്രശ്നത്തേക്കുറിച്ച് താനറിയുന്നതെന്ന് നസ്ലെൻ പറഞ്ഞു. ഫെയ്സ്ബുക്കില് എനിക്കുള്ളത് ഒരു പേജാണ്. അത് കൈകാര്യം ചെയ്യുന്നത് ഞാനല്ല. സോഷ്യല് മീഡിയയില് അത്ര ആക്ടീവുമല്ലെന്നും അദ്ദേഹം ചൂണ്ടിക്കാട്ടി.ഇത് തന്റെ പേരും ചിത്രവുമുപയോഗിച്ച് നിർമിച്ച വ്യാജ അക്കൗണ്ടാണെന്ന് വ്യക്തമാക്കി ഇൻസ്റ്റാഗ്രാമിൽ നസ്ലിൻ ഒരു വീഡിയോ പോസ്റ്റ് ചെയ്തിട്ടുണ്ട്.കാക്കനാട്ടെ സൈബര് സെല് ഓഫീസില് നല്കിയ പരാതിയുടെ കോപ്പിയും വീഡിയോക്കൊപ്പം താരം ചേര്ത്തിട്ടുണ്ട്.ഇന്നലെ രാത്രിയോടെയാണ് നസ്ലിന്റെ പേരിലുള്ള വ്യാജ അക്കൗണ്ടില് നിന്ന് പോസ്റ്റ് ചെയ്ത ഒരു കമന്റ് സോഷ്യല് മീഡിയിയല് വൈറലാകുന്നത്. പ്രധാനമന്ത്രി നരേന്ദ്ര മോദിയുടെ പിറന്നാള് ദിനത്തില് ഇന്ത്യയിലേക്ക് കൊണ്ടുവന്ന ചീറ്റപ്പുലുകളുടെ വാര്ത്തകള്ക്ക് താഴെയായിരുന്നു കമന്റ്. തുടര്ന്ന് നടന്റെ ഔദ്യോഗിക അക്കൗണ്ടാണെന്ന് വിചാരിച്ച് താരത്തിനെതിരെ അധിക്ഷേപ കമന്റുകളും വന്നിരുന്നു. തുടര്ന്നാണ് ഈ നിയമനടപടികളുമായി മുന്നോട്ട് പോകാന് നസ്ലിന് തീരുമാനിച്ചത്.
പ്രധാനമന്ത്രിക്കെതിരെ കമന്റ്;വ്യാജ ഫേസ്ബുക്ക് അക്കൗണ്ടിനെതിരെ പരാതി നല്കി നസ്ലിന്
