ഹാഥ്റസ് കേസില് ദലിത് പെണ്കുട്ടിയെ കൂട്ടബലാത്സംഗത്തിന് ഇരയാക്കി കൊലപ്പെടുത്തിയെന്ന് സി.ബി.ഐ കുറ്റപത്രം. കൂട്ടബലാത്സംഗം, കൊലപാതകം എന്നീ വകുപ്പുകളാണ് പ്രതികള്ക്കെതിരെ ചുമത്തിയിട്ടുള്ളത്.
ഡിസംബര് പത്തിനകം അന്വേഷണം പൂര്ത്തിയാക്കുമെന്നാണ് നവംബര് 25-ന് സി.ബി.ഐ. ഹൈക്കോടതിയെ അറിയിച്ചിരുന്നത്. അന്വേഷണത്തിന് കൂടുതല് സമയം വേണമെന്ന സി.ബി.ഐ.യുടെ ആവശ്യത്തെത്തുടര്ന്ന് ഹാഥ്റസ് ബലാത്സംഗക്കൊലക്കേസ് പരിഗണിക്കുന്നത് അലഹാബാദ് ഹൈക്കോടതിയുടെ ലഖ്നൗ ബെഞ്ച് ജനുവരി 27-ലേക്ക് മാറ്റിവെച്ചിരുന്നു.
ഇന്ന് ഉച്ചയോടെയാണ് ഹാഥ്രസിലെ കോടതിയില് കുറ്റപത്രം സമര്പ്പിച്ചത്. പെണ്കുട്ടിയുടെ മരണമൊഴിയുടെ അടിസ്ഥാനത്തിലാണ് കുറ്റപത്രമെന്ന് റിപ്പോര്ട്ടുകളില് പറയുന്നു. ബലാത്സംഗം നടന്നിട്ടില്ലെന്നായിരുന്നു, മെഡിക്കല് റിപ്പോര്ട്ടുകള് ഉദ്ധരിച്ച് യുപി പൊലീസ് അവകാശപ്പെട്ടത്.
കഴിഞ്ഞ സെപ്റ്റംബര് 14-നാണ് ഉത്തര്പ്രദേശ് ഹാഥ്റസിലെ ഇരുപതുകാരിയായ ദലിത് പെണ്കുട്ടിയെ നാലുപേര് ചേര്ന്ന് ക്രൂരമായി ബലാത്സംഗം ചെയ്തത്. അവശനിലയില് വയലില് കണ്ടെത്തിയ പെണ്കുട്ടിയെ ആദ്യം അലിഗഢിലെ ആശുപത്രിയിലും പിന്നീട് ഡല്ഹി സഫ്ദര്ജങ് ആശുപത്രിയിലും പ്രവേശിപ്പിച്ചു. സെപ്റ്റംബര് 30-ന് പെണ്കുട്ടിയുടെ മാതാപിതാക്കളുടെ അനുമതിയില്ലാതെ മൃതദേഹം അര്ദ്ധരാത്രി സംസ്കരിച്ചത് രാജ്യത്തുടനീളം വലിയ പ്രതിഷേധങ്ങള്ക്ക് വഴിവെച്ചിരുന്നു.
പ്രതിഷേധം ശക്തമായതോടെ യു.പി സര്ക്കാര് ആവശ്യപ്പെട്ടത് അനുസരിച്ചാണ് കേസ് സി.ബി.ഐ ഏറ്റെടുത്തത്. അന്വേഷണ അലഹാബാദ് ഹൈക്കോടതിയുടെ മേല്നോട്ടത്തില് വേണമെന്ന് സുപ്രീം കോടതി നിര്ദേശിച്ചിട്ടുണ്ട്.
