രാജ്യത്ത് കോവിഡ് വ്യാപനം രൂക്ഷമാകാന് രാഷ്ട്രീയ, മതപരമായ പരിപാടികള് കാരണമായതായി ലോകാരോഗ്യ സംഘടന. മതചടങ്ങുകളിലും രാഷ്ട്രീയ പരിപാടികളിലും ആളുകള് തിങ്ങി നിറഞ്ഞ് പങ്കെടുത്തതാണ് കൊവിഡ് വ്യാപിച്ചതിന് കാരണമായതെന്നാണ് ലോകാരോഗ്യ സംഘടന പറഞ്ഞത്.
കൊവിഡ് വൈറസിന്റെ വകഭേദം പെട്ടെന്ന് വ്യാപിക്കാന് ഇടയായതും, വിവിധ രാഷ്ട്രീയ മത പരിപാടികളില് ആളുകള് ഒരുമിച്ച് കൂടിയതും പൊതുജനങ്ങളുടെ സുരക്ഷയ്ക്ക് കാര്യമായ ശ്രദ്ധ നല്കാതിരുന്നതുമാണ് രാജ്യത്ത് കൊവിഡ് വര്ധിക്കാനുള്ള കാരണമെന്നും അദ്ദേഹം പറഞ്ഞു.
ദക്ഷിണ-കിഴക്കന് ഏഷ്യയിലെ കൊവിഡ് രോഗികളില് 95 ശതമാനം കൊവിഡ് കേസുകളും 93 ശതമാനത്തോളം കൊവിഡ് മരണങ്ങളും റിപ്പോര്ട്ട് ചെയ്യുന്നത് ഇന്ത്യയിലാണെന്നും ലോകാരോഗ്യ സംഘടന പുറത്ത് വിട്ട റിപ്പോര്ട്ടില് പറയുന്നു.
കഴിഞ്ഞമാസമാണ് കേരളം ഉള്പ്പെടെ വിവിധ സംസ്ഥാനങ്ങളില് തെരഞ്ഞെടുപ്പ് നടന്നത്. തെരഞ്ഞെടുപ്പ് പ്രചാരണത്തില് വലിയ തോതിലുള്ള ആള്ക്കൂട്ടമാണ് ദൃശ്യമായത്. ഇതിന് പുറമേ അടുത്തിടെ നടന്ന കുംഭമേളയില് പങ്കെടുത്ത നിരവധിപ്പേര്ക്ക് കോവിഡ് സ്ഥിരീകരിച്ചതും വാര്ത്തകളായി പുറത്തുവന്നിരുന്നു.
കോവിഡ് കേസുകള് ഉയരുന്നതിലും മരണസംഖ്യ വര്ധിക്കുന്നതിലും പ്രധാന കാരണം ബി.1.617 എന്ന മാരക വൈറസ് വകഭേദമാണ് എന്ന തരത്തില് റിപ്പോര്ട്ടുകളുണ്ട്. ഇതിന്റെ സാന്നിധ്യം സംബന്ധിച്ചും മറ്റു വകഭേദങ്ങളുടെ വ്യാപനവുമായി ബന്ധപ്പെട്ടും നിരവധി ചോദ്യങ്ങള് ഉയരുന്നതായും റിപ്പോര്ട്ടില് പറയുന്നു. ഒക്ടോബറിലാണ് ബി.1.617 വകഭേദത്തിന്റെ സാന്നിധ്യം ഇന്ത്യയില് കണ്ടെത്തിയത്. ഇതാകാം കോവിഡ് കേസുകള് ഉയരാന് പ്രധാന കാരണമെന്നും ലോകാരോഗ്യ സംഘടനയുടെ റിപ്പോര്ട്ടില് പറയുന്നു.