കര്ണാടകയിലെ ഹിജാബ് വിവാദവുമായി ബന്ധപ്പെട്ട ഹര്ജികൾ അടിയന്തരമായി പരിഗണക്കണമെന്ന ആവശ്യം നിരസിച്ച് സുപ്രിംകോടതി. ഹിജാബ് വിഷയം ഉചിതമായ സമയത്ത് പരിഗണിക്കുമെന്ന് ചീഫ് ജസ്റ്റിസ് എന് വി രമണ വ്യക്തമാക്കി.ഹിജാബ് വിഷയം ദേശീയ തലത്തിലേക്ക് വ്യാപിക്കരുതെന്ന് ചീഫ് ജസ്റ്റിസ് എന്.വി. രമണവ്യക്തമാക്കി. വിദ്യാഭ്യാസ സ്ഥാപനങ്ങളില് ഹിജാബ് ധരിക്കുന്നതിനെതിരായ ഉത്തരവ് ചോദ്യംചെയ്തുള്ള ഹര്ജിയില് തീര്പ്പ് കല്പ്പിക്കുംവരെ കോളേജുകളില് മതപരമായ വേഷങ്ങള് ധരിക്കരുതെന്ന് കഴിഞ്ഞ ദിവസം കര്ണാടക ഹൈക്കോടതി നിര്ദേശിച്ചിരുന്നു. ഇതിനെ ചോദ്യംചെയ്താണ് സുപ്രീംകോടതിയില് ഹര്ജി ഫയല് ചെയ്തിരുന്നത്. കര്ണാടകത്തില് നടക്കുന്നത് തങ്ങള് വീക്ഷിക്കുന്നുണ്ട്. എന്നാല് ഇക്കാര്യത്തില് ഹൈക്കോടതിയാണ് ആദ്യം തീരുമാനം എടുക്കേണ്ടതെന്ന് ചീഫ് ജസ്റ്റിസ് എന്.വി. രമണ വ്യക്തമാക്കി. എല്ലാവരുടെയും ഭരണഘടനാപരമായ അവകാശങ്ങള് സംരക്ഷിക്കാന് കോടതിക്ക് ബാധ്യതയുണ്ട്. ഉചിതമായ സമയത്ത് കോടതിയുടെ ഇടപെടല് ഉണ്ടാകുമെന്നും ചീഫ് ജസ്റ്റിസ് അറിയിച്ചു.
ഹിജാബ് വിവാദത്തെത്തുടര്ന്ന് അടച്ചിട്ട വിദ്യാഭ്യാസ സ്ഥാപനങ്ങള് തുറക്കണമെന്നാണ് ഇന്നലെ കര്ണാടക ഹൈക്കോടതി ഇടക്കാല ഉത്തരവ് പുറപ്പെടുവിച്ചത്. കേസ് തിങ്കളാഴ്ച ഉച്ചയ്ക്ക് 2.30ന് വീണ്ടും പരിഗണിക്കാനിരിക്കെയായിരുന്നു ഹൈക്കോടതിയുടെ ഇടക്കാല ഉത്തരവ്. കേസ് കോടതിയുടെ പരിഗണനയിലിരിക്കുന്നതിനാല് വിധി വരുന്നതുവരെ മതപരമായ വസ്ത്രങ്ങള് ഒഴിവാക്കണമെന്ന് ഹൈക്കോടതി വിശാലബെഞ്ച് നിര്ദ്ദേശിച്ചിട്ടുണ്ട്. കേസില് തീര്പ്പ് ഉണ്ടാകുന്നതുവരെ എല്ലാവരും സംയമനം പാലിക്കണമെന്നും ഹൈക്കോടതി ചീഫ് ജസ്റ്റിസ് റിതുരാജ് അവസ്തി പറഞ്ഞു.
