രാജസ്ഥാനില് 90 അടി താഴ്ചയുള്ള കുഴല്ക്കിണറില് വീണ നാലുവയസുകാരനെ 16 മണിക്കൂര് നീണ്ട പരിശ്രമത്തിന് ഒടുവിൽ രക്ഷിച്ചു.രാജസ്ഥാനിലെ ജലോറില് വ്യാഴാഴ്ച രാവില പത്തുമണിക്കാണ് സംഭവം. ലച്ചാരി ഗ്രാമത്തില് പുതുതായി കുഴിച്ച കുഴല്ക്കിണറിന് സമീപം കളിച്ചു കൊണ്ടിരിക്കേ നാലുവയസുകാരനായ അനിലാണ് അപകടത്തില്പ്പെട്ടത്.
ദേശീയ ദുരന്തനിവാരണ സേന അടക്കം നിരവധിപ്പേര് ചേര്ന്നാണ് മണിക്കൂറുകള് നീണ്ട പരിശ്രമത്തിന് ഒടുവില് കുട്ടിയെ രക്ഷിച്ചത്. വെള്ളിയാഴ്ച പുലര്ച്ചെയാണ് നാട്ടുകാരുടെ സഹായത്തോട് കൂടി കുട്ടിയെ പുതിയ ജീവിതത്തിലേക്ക് നയിച്ചത്.
കുട്ടി സുരക്ഷിതമാണെന്നും ആരോഗ്യനിലയില് ഭയപ്പെടാനില്ലെന്നും അധികൃതര് അറിയിച്ചു. ആശുപത്രിയില് പ്രവേശിപ്പിച്ച കുട്ടിയെ ഡോക്ടര്മാര് നിരീക്ഷിച്ചു വരികയാണ്. കുഴല്ക്കിണറില് കുടുങ്ങി കിടന്ന സമയത്ത് കുട്ടിക്ക് ഓക്സിജന് സഹായം നല്കിയിരുന്നു. പൈപ്പ്ലൈന് വഴിയാണ് കുട്ടിക്ക് ഓക്സിജന് എത്തിച്ചത്.
