അമേരിക്കന് പ്രസിഡണ്ട് തെരഞ്ഞെടുപ്പ് ഫലം കാത്തിരിക്കെ റെക്കോഡ് സ്വന്തമാക്കി ഡെമോക്രാറ്റിക് സ്ഥാനാര്ത്ഥി ജോ ബൈഡന്. അമേരിക്കന് പ്രസിഡണ്ട് തെരഞ്ഞെടുപ്പ് ചരിത്രത്തില് ഒരു സ്ഥാനാര്ത്ഥിയ്ക്ക് ലഭിക്കുന്ന ഏറ്റവും കൂടുതല് വോട്ട് ബൈഡന് ലഭിച്ചു.
7 കോടി വോട്ടാണ് നവംബര് നാലിലെ കണക്ക് പ്രകാരം ബൈഡന് ലഭിച്ചതെന്ന് എന്.പി.ആര് (നാഷണല് പബ്ലിക് റേഡിയോ) റിപ്പോര്ട്ട് ചെയ്യുന്നു. മുന് പ്രസിഡന്റ് ബറാക് ഒബാമയുടെ റെക്കോര്ഡ് ജോ ബൈഡന് തകര്ത്തെന്നാണ് റിപ്പോര്ട്ട്.
2008 ല് ഒബാമയ്ക്ക് ലഭിച്ച 69,498,516 വോട്ടുകളുടെ റെക്കോര്ഡാണ് ബൈഡന് മറികടന്നത്. നവംബര് 4 വരെ, ബൈഡന് 7.07 കോടി വോട്ടുകള് ലഭിച്ചു. 2008 ല് ഒബാമയ്ക്ക് ലഭിച്ചതിനേക്കാള് മൂന്ന് ലക്ഷം കൂടുതല് വോട്ടുകളാണ് ബൈഡന് നേടിയത്.
അന്ന് ഒബാമ നേടിയത് തന്നെ റെക്കോഡ് വോട്ടായിരുന്നു. നിലവിലെ പ്രസിഡന്റ് ഡൊണാള്ഡ് ട്രംപിനേക്കാളും 2.7 കോടി വോട്ടുകള്ക്ക് മുന്നിലാണ് ബൈഡന്.
വോട്ടെണ്ണല് പുരോഗമിക്കുമ്പോള് ലീഡ് കൂടിക്കൊണ്ടിരിക്കുകയാണ്.
കാലിഫോര്ണിയയിലടക്കം രാജ്യത്തുടനീളം കോടിക്കണക്കിന് വോട്ടുകള് ഇപ്പോഴും തിട്ടപ്പെടുത്തിയിട്ടില്ലെന്നും നാഷണല് പബ്ലിക് റേഡിയോ റിപ്പോര്ട്ട് ചെയ്യുന്നു.
അമേരിക്കന് പ്രസിഡന്റ് തെരഞ്ഞെടുപ്പ് ഫോട്ടോ ഫിനിഷിങ്ങിലേക്ക് കടക്കുമെന്ന് കണക്കുകള്. ഒടുവില് വരുന്ന റിപ്പോര്ട്ടുകള് പ്രകാരം ഡെമോക്രാറ്റിക് സ്ഥാനാര്ഥി ജോ ബൈഡന് ആണ് മുന്തൂക്കം.
നിലവില് 264 ഇലക്ട്രല് വോട്ടുകളാണ് ജോ ബൈഡന് ലഭിച്ചിരിക്കുന്നത്. ട്രംപിന് 214 വോട്ടുകളാണ് ഉള്ളത്. ആറ് ഇലക്ട്രല് വോട്ടുകള് കൂടി ലഭിച്ചാല് കേവല ഭൂരിപക്ഷം ജോ ബൈഡന് ലഭിക്കും.
