മഹാരാഷ്ട്രയില് വിശ്വാസ വോട്ട് നേടി ഷിന്ഡെ സര്ക്കാര്. ഇന്ന് നടന്ന വിശ്വാസ വോട്ടെടുപ്പില് 164 പേരുടെ പിന്തുണ നേടിയാണ് ജയം. നിര്ണായകമായ വിശ്വാസ വോട്ടെടുപ്പിനിടയിലും ഒരു ഉദ്ധവ് പക്ഷ ശിവസേന എംഎല്എയെ കൂടി ഷിന്ദേ പക്ഷത്തേക്ക് ചാടി. 99 എംഎല്എമാര് അവിശ്വാസം രേഖപ്പെടുത്തി. ഞായറാഴ്ച നടന്ന സ്പീക്കര് തിരഞ്ഞെടുപ്പിനേക്കാള് എട്ടു വോട്ടുകളുടെ കുറവുണ്ടായിട്ടുണ്ട് പ്രതിപക്ഷത്തിന്.
കോണ്ഗ്രസ് എംഎല്എമാരായ അശോക് ചവാര്, വിജയ് വഡേട്ടിവാര് എന്നിവര് സഭയില് എത്തിയില്ല. ഇന്നലെ ബിജെപിയുടെ രാഹുല് നര്വേക്കര് സ്പീക്കറായി തിരഞ്ഞെടുക്കപ്പെട്ടിരുന്നു.
നിലവില് 288 അംഗ നിയമസഭയില് ബിജെപിക്ക് 106 എംഎല്എമാരുണ്ട്. 50 പേരുടെ പിന്തുണയുണ്ടെന്നാണ് ഷിന്ഡെ വിഭാഗത്തിന്റെ നിലപാട്. ഇതില് 39 പേര് ശിവസേന വിമതരാണ്. ഒരു ശിവസേന എംഎല്എയുടെ മരണത്തോടെ ആകെ അംഗസംഖ്യ 287 ആയി. ഇതോടെ വിശ്വാസവോട്ടെടുപ്പ് ജയിക്കാന് 144 വോട്ടാണ് വേണ്ടിവരിക.
