എയര് ഇന്ത്യ വിമാനത്തിന്റെ ബിസിനസ് ക്ലാസില് മദ്യലഹരിയിൽ വനിത യാത്രക്കാരിയ്ക്കു നേരെ മൂത്രമൊഴിച്ച് സഹയാത്രികൻ. ന്യൂയോര്ക്കില്നിന്ന് ഡല്ഹിയിലേക്കുള്ള എയര് ഇന്ത്യയുടെ എഐ-102 വിമാനത്തിലെ ബിസിനസ് ക്ലാസിലാണ് സംഭവം. യാത്രക്കാരി സംഭവം ജീവനക്കാരുടെ ശ്രദ്ധയില് പെടുത്തിയിട്ടും ഒരു നടപടിയും ഉണ്ടായില്ല. വിമാനം ഡല്ഹിയില് ഇറങ്ങിയപ്പോള് അക്രമം നടത്തിയയാള് യാതൊരു നടപടിയും നേരിടാതെ വിമാനത്താവളത്തില്നിന്നു പുറത്തുപോയി.പരാതി ടാറ്റാ ഗ്രൂപ്പ് ചെയര്മാന് എന്. ചന്ദ്രശേഖരന് രേഖാമൂലം നല്കിയതോടെ മാത്രമാണ് അന്വേഷണത്തിന് എയര് ഇന്ത്യ തയ്യാറായത്. സംഭവം കടുത്ത ആഘാതമാണ് തനിക്ക് ഉണ്ടാക്കിയത് വിഷയം കൈകാര്യം ചെയ്യുന്നതില് വിമാനത്തിലെ ജീവനക്കാര് പരാജയപ്പെട്ടു. തന്റെ സുരക്ഷ ഉറപ്പുവരുത്താന് യാതൊരു നടപടിയും ജീവനക്കാര് കൈക്കൊണ്ടില്ലെന്നും പരാതിയില് പറയുന്നു.
വിമാന ജീവനക്കാര് യാതൊരു തരത്തിലും സഹകരിച്ചില്ലെന്ന് പരാതിക്കാരി എന്. ചന്ദ്രശേഖരനുള്ള കത്തില് പറയുന്നു. ഉച്ചയ്ക്ക് ആഹാരം നല്കിയ ശേഷം വിളക്കുകള് അണച്ച ശേഷമായിരുന്നു സംഭവം. പൂര്ണമായും മദ്യലഹരിയിലായിരുന്ന ഒരു യാത്രക്കാരന് എന്റെ സീറ്റിനടുത്തേക്ക് വരികയായിരുന്നു. തുടര്ന്ന് പാന്റിന്റെ സിപ്പ് അഴിച്ച ശേഷം സ്വകാര്യ ഭാഗങ്ങള് എന്റെ നേരെ പ്രദര്ശിപ്പിച്ചു. തുടര്ന്ന് മൂത്രമൊഴിച്ച ശേഷം അവിടെ തന്നെ നില്ക്കുകയായിരുന്നു. മറ്റൊരു യാത്രക്കാരനെത്തി മാറാന് പറഞ്ഞപ്പോള് മാത്രമാണ് അയാള് അവിടെനിന്നു പോയത്. എന്റെ വസ്ത്രവും ഷൂവും ബാഗും മുഴുവനും മൂത്രം വീണ് നനഞ്ഞു. തുടര്ന്ന് വിമാനജീവനക്കാരെത്തി അണുനാശിനിയും മറ്റും തളിക്കുകയായിരുന്നു.’ പരാതിക്കാരിയുടെ കത്തില് പറയുന്നു. ക്യാബിന് ക്രൂവാണ് പിന്നീട് യാത്രക്കാരിക്ക് പൈജാമയും ചെരിപ്പും നല്കിയത്. നനഞ്ഞ സീറ്റില് ഇരിക്കാന് കഴിയാത്തതിനാല് ജീവനക്കാരുടെ സീറ്റ് നല്കുകയായിരുന്നു. വിമാനത്തിന്റെ ഫസ്റ്റ് ക്ലാസില് സീറ്റുകള് ഒഴിവുണ്ടായിട്ടും നനഞ്ഞ സീറ്റില് ഇരിക്കാന് ജീവനക്കാര് നിര്ബന്ധിച്ചുവെന്നും പരാതിയില് പറയുന്നു. രണ്ട് മണിക്കൂറിനു ശേഷമാണ് മറ്റൊരു സീറ്റ് നല്കിയത്.അതേസമയം, സംഭവം പോലീസിലും മറ്റ് ബന്ധപ്പെട്ട വകുപ്പുകളേയും അറിയിച്ചിട്ടുണ്ടെന്നും പരാതിക്കാരിയുമായി നിരന്തരം ബന്ധപ്പെട്ടുകൊണ്ടിരിക്കുകയാണെന്നും എയര് ഇന്ത്യ കുറിപ്പില് അറിയിച്ചു.
എയര് ഇന്ത്യ വിമാനത്തിൽ മദ്യപിച്ച് ലക്കുകെട്ട് യാത്രക്കാരിയുടെ ദേഹത്തേക്കു സഹയാത്രികൻ മൂത്രമൊഴിച്ചു, നഗ്നതാപ്രദര്ശനവും
