കുന്ദമംഗലം: മാലിന്യമുക്തം നവകേരളം പദ്ധതിയുടെ ഭാഗമായി വിദ്യാഭ്യാസ വകുപ്പും തദ്ദേശ സ്വയംഭരണ വകുപ്പും ചേർന്ന് നടപ്പാക്കിയ വിദ്യാർത്ഥി ഹരിത സേന സ്കോളർഷിപ്പ്- ഇക്കോ സെൻസ് പദ്ധതിയിൽ കുന്ദമംഗലം ഗ്രാമപഞ്ചായത്തിലെ ഏറ്റവും മികച്ച സ്കൂളായി തെരഞ്ഞെടുക്കപ്പെട്ട കാരന്തൂർ മർകസ് ഗേൾസ് ഹൈസ്കൂളിന് പുരസ്കാരം സമ്മാനിച്ചു.
കുന്ദമംഗലം സാംസ്കാരിക നിലയത്തിൽ നടന്ന ശുചിത്വ പഠനോത്സവത്തിൽ ഗ്രാമപഞ്ചായത്ത് പ്രസിഡണ്ട് സി വി സംജിത്ത് പുരസ്കാരം നൽകി.
മർകസ് ഗേൾസ് ഹൈസ്കൂളിലെ വിദ്യാർത്ഥികളായ അമീന വി കെ, ആയിഷ ലാമിയ പ്രധാനധ്യാപകൻ നിയാസ് ചോല എന്നിവർ ചേർന്ന് ഉപഹാരം ഏറ്റുവാങ്ങി.
മാലിന്യ സംസ്കരണവും പരിസ്ഥിതി സംരക്ഷണവും സംബന്ധിച്ച് വിദ്യാർഥികളിൽ അവബോധം സൃഷ്ടിക്കുന്നതിനാണ് വിദ്യാർത്ഥി ഹരിതസേന സ്കോളർഷിപ്പ് പദ്ധതി ആരംഭിച്ചത്.
വിദ്യാർത്ഥികളിൽ പ്രകൃതി സ്നേഹവും പരിസ്ഥിതി അവബോധവും സൃഷ്ടിക്കുന്നതിനായി നിരവധി പദ്ധതികൾ നടപ്പാക്കിവരുന്ന വിദ്യാലയമാണ് കാരന്തൂർ മർകസ് ഗേൾസ് ഹൈസ്കൂൾ. വിവിധ പാഴ് വസ്തുക്കൾ ഉപയോഗിച്ച് പൂന്തോട്ട നിർമ്മാണവും ഔഷധോദ്യാനവും സ്കൂളിൽ സംവിധാനിച്ചിട്ടുണ്ട്.
മർകസ് ഗേൾസ് ഹൈസ്കൂളിന്റെ ഇത്തരം മികവുകളാണ് പുരസ്കാരത്തിന് അർഹമാക്കിയത്.
