തൃശ്ശൂര്: കഞ്ചാവ് കേസ് പ്രതിയായ ഷമീര് കോവിഡ് കേന്ദ്രത്തില് മരിച്ചത് ക്രൂരമര്ദ്ദനമേറ്റെന്ന് പോസ്റ്റ്മോര്ട്ടം റിപ്പോര്ട്ട്. ഷമീറിന്റെ ശരീരത്തില് നാല്പതിലേറെ മുറിവുകളുണ്ട്. ശരീരത്തിന്റെ പിന്ഭാഗത്ത് അടിയേറ്റ് രക്തം വാര്ന്ന് പോയിട്ടുണ്ടെന്നും പോസ്റ്റ്മോര്ട്ടം റിപ്പോര്ട്ടില് പറയുന്നു.
തലയ്ക്ക് ക്ഷതമേറ്റെന്നും ഏതാനും വാരിയെല്ലുകളും നെഞ്ചിലെ എല്ലുകളും പൊട്ടിയിട്ടുണ്ടെന്നും പോസ്റ്റ്മോര്ട്ടം റിപ്പോര്ട്ടില് പറയുന്നു.
സെപ്തംബര് 29നാണ് പത്ത് കിലോ കഞ്ചാവുമായി തൃശ്ശൂര് ശക്തന് സ്റ്റാന്ഡില് നിന്നും ഷമീറിനെയും, ഷമീറിന്റെ ഭാര്യയെയും മറ്റ് രണ്ട് പേരെയും പൊലീസ് പിടികൂടുന്നത്. ഈസ്റ്റ് പൊലീസാണ് ഇവരെ അറസ്റ്റ് ചെയ്തത്. തുടര്ന്ന് കൊവിഡ് സെന്ററിലേക്ക് മാറ്റിയ ഷമീര് സെപ്തംബര് 30ന് ശാരീരിക അസ്വസ്ഥതകള് പ്രകടിപ്പിച്ചതിനെ തുടര്ന്ന് തൃശ്ശൂര് ജനറല് ആശുപത്രിയിലേക്ക് മാറ്റിയിരുന്നു. ഇവിടെയെത്തിയ ശേഷം രക്ഷപ്പെടാന് ശ്രമിച്ച ഷമീറിനെ ജയില് ജീവനക്കാര് പിടികൂടി മര്ദ്ദിച്ചെന്ന് ദൃക്സാക്ഷികളും ഭാര്യയും പറഞ്ഞിരുന്നു.