മേയ് 4 മുതല്‍ ജോലിക്കെത്തുന്ന പൊതു-സ്വകാര്യ മേഖലകളിലെ എല്ലാ ജീവനക്കാരും നിര്‍ബന്ധമായും ആരോഗ്യ സേതു ആപ്പ് ഡൗണ്‍ലോഡ് ചെയ്യണമെന്ന് ആഭ്യന്തര മന്ത്രാലയം.
മേയ് 17 വരെ നീട്ടിയ ലോക്ക്ഡൗണിനായുള്ള ആഭ്യന്തര മന്ത്രാലയത്തിന്റെ പുതിയ മാര്‍ഗ്ഗനിര്‍ദ്ദേശങ്ങളുടെ ഭാഗമായാണ് നിര്‍ദ്ദേശം.
റെഡ് സോണുകളില്‍ ഉള്‍പ്പെടെ 33% ജീവനക്കാരുമായി ഓഫീസുകള്‍ പ്രവര്‍ത്തിക്കാന്‍ സര്‍ക്കാര്‍ അനുവാദം നല്‍കിയിട്ടുണ്ട്. സര്‍ക്കാര്‍ മേഖലയില്‍ ഡയറക്ടര്‍ പദവിക്ക് മുകളിലുള്ള എല്ലാ ഉദ്യോഗസ്ഥരും ഹാജരാകണം.
ഉത്തരവ് അനുസരിച്ച്, 100% ജീവനക്കാരും ഈ ആപ്ലിക്കേഷന്‍ ഡൗണ്‍ലോഡ് ചെയ്യുന്നുവെന്ന് ഉറപ്പാക്കേണ്ടത് സ്ഥാപനമേധാവിയുടെ ഉത്തരവാദിത്തമായിരിക്കും. ധാരാളം കേസുകള്‍ കണ്ടെത്തിയ കോവിഡ്-19 കണ്ടെയ്‌നര്‍ സോണുകളില്‍ താമസിക്കുന്ന എല്ലാ ആളുകളും നിര്‍ബന്ധമായും അപ്ലിക്കേഷന്‍ ഡൗണ്‍ലോഡുചെയ്യേണ്ടതുണ്ട്.
ലോക്ക്ഡൗണ്‍ നിര്‍ദ്ദേശങ്ങള്‍ അവഗണിക്കുന്നത് രണ്ട് വര്‍ഷം വരെ നീണ്ടുനില്‍ക്കുന്ന ജയില്‍ ശിക്ഷ ലഭിക്കാവുന്ന കുറ്റകൃത്യമാണെന്നും 2005 ലെ ദുരന്ത നിവാരണ നിയമപ്രകാരം പുറപ്പെടുവിച്ച ഉത്തരവ് വ്യക്തമാക്കുന്നു.
